दिवाळी अंक प्रदर्शन दिल्लीकर वाचकांसाठी पर्वणी : उपविभागीय जिल्हाधिकारी डॉ. पियुष रोहणकर

 

 

नवी दिल्ली, 29 : दिवाळी अंक प्रदर्शन दिल्लीकर वाचकांसाठी पर्वणी असल्याचे गौरव उदगार उपविभागीय जिल्हाअध‍िकारी डॉ. पियुष रोहणकर यांनी आज येथे काढले.

 महाराष्ट्र परिचय केंद्रातील ग्रंथालयात आज ‘दिवाळी अंक प्रदर्शना’चे उद्घाटन नवी दिल्ली जिल्ह्याच्या छावणी उप विभागीय जिल्ह्याधिकारी डॉ. पियुष रोहणकर यांच्या हस्ते करण्यात आले. त्यावेळी ते बोलत होते. जनसंपर्क अधिकारी तथा उपसंचालक (अ.का.) अमरज्योत कौर अरोरा यांनी श्री रोहणकर यांचे पुष्पगुच्छ देऊन स्वागत केले. यावेळी माहिती अधिकारी अंजु निमसरकर, उपसंपादक रीतेश भुयार, ग्रंथपाल रामेश्वर बरडे तसेच परिचय केंद्राचे कर्मचारी उपस्थित होते.

ते पुढे म्हणाले, आजचा काळ हा सामाजिक माध्यमांचा असूनही वाचन संस्कृतीला वाढविण्याचे काम दिवाळी अंकानिमित्त होत आहे हे प्रशंसन‍ियच आहे. परिचय केंद्राच्यावतीने दिवाळी अंक प्रदर्शन मांडणे हे महाराष्ट्राच्या सांस्कृतिक पंरपरेला साजेसा उपक्रम असल्याचेही डॉ. रोहणकर यावेळी म्हणाले.

डॉ. पियुष रोहणकर हे वर्ष 2014 च्या भारतीय प्रशासक‍िय सेवा (दानिक्स) कॅडरचे अधिकारी आहेत. यासोबत ते लेखक ही आहेत त्यांनी स्पर्धा परीक्षेचा अभ्यास करणा-यांवर आधारीत  ‘ए प्लेसेंट इस्केप’  ही इंग्रजीत कांदबरी लिहीली आहे. यासह ते कवीता करतात.  आजच्या कार्यक्रमात त्यांनी  शेरही म्हणुन दाखविला.

 

आजपासून दिवाळी अंक प्रदर्शन वाचकांसाठी खुले महाराष्ट्र परिचय केंद्राच्या दिवाळी अंक प्रदर्शनात विविध विषयांवरील नामांकीत प्रकाशकांसह नवोदित प्रकाशकांचीही  60 च्या वर दिवाळी अंक मांडण्यात आलेले आहेत. यामध्ये चांगुलपणाची चळवळ, महाराष्ट्राची जत्रा, किशोर, कालनिर्णय, दिवाळी आवाज, मिळून सा-याजणी, तारांगण, माहेर, मार्मिक, महाराष्ट्र टाइम्स, लोकसत्ता, सामना, लोकप्रभा, मिडिया वॉच, लोकमत दिपोत्सव असे एकापेक्षा एक सरस वाचनीय दिवाळी अंक परिचय केंद्रात वाचकांसाठी उपलब्ध आहेत.   हे प्रदर्शन आजपासून ग्रंथालय सदस्यांसाठी खुले आहे.  हे प्रदर्शन पुढील पाच दिवस शुक्रवारपर्यंत राहील.