राज्यात इंधन स्वस्त होणार गिरीष बापट

                                                                         

नवी दिल्ली, ०३ :  येत्या आठवडाभरात महाराष्ट्रात पेट्रोल ९५ पैस्यांनी तर डिझेल ६६ पैस्यांनी स्वस्त होणार आहे. तसेच घरगुती वापराच्या गॅसवरही सुट मिळणार असल्याची माहिती राज्याचे अन्न व नागरी पुरवठा आणि  ग्राहक संरक्षणमंत्री गिरीष बापट यांनी दिली.

      तेल कंपन्यांनी राज्यात इंधनावर लावलेला अतिरीक्त अधिभार कमी करण्याच्या मागणीसाठी श्री. बापट यांनी आज केंद्रीय पेट्रोलियम व नैसर्गिक वायु राज्य मंत्री धर्मेंद्र प्रधान यांची भेट घेतली. या भेटी नंतर त्यांनी ही माहिती दिली.  राज्यात पेट्रोल, डिझेल, एलपीजी आणि रॉकेलवर विशेष अधिभार लावून बेकायदेशीररित्या अतिरीक्त वसुली केली जात असल्याची तक्रार फेडरेशन ऑफ ऑल इंडिया पेट्रोल डिलर असोसिएशनकडून प्राप्त झाली होती. या तक्रारीबाबत तेल कंपन्यांची बैठक बोलविण्यात आली  होती त्यात त्यांनी अतिरीक्त अधिभार लावण्यात येत असल्याची बाब मान्य केली होती. इंधनावरील हा अतिरीक्त अधिभार कमी करण्याचा प्रस्ताव राज्यसरकारने  केंद्रीय पेट्रोलियम मंत्रालयाकडे पाठविला होता. तसेच तेल कंपन्यांनी  अतिरीक्त वसुली पैकी वर्ष २०१४-२०१५ मधील विशेष अधिभार कमी करण्याबाबतचा  प्रस्ताव केंद्राकडे  पाठविला होता.  

            राज्याच्या प्रस्तावाचा पाठपुरावा करण्यासाठी आज श्री बापट यांनी केंद्रीय मंत्री श्री प्रधान यांची भेट घेतली . या बैठकीत श्री. प्रधान यांनी राज्याच्या प्रस्तावास मान्यता दिली. या मान्यतेमुळे येत्या आठ दिवसांत राज्यात , पेट्रोलवर ९५ पैसे, डिसेलवर ६६ पैसे, घरगुती वापराच्या इंधनावरही काही प्रमाणात सुट मिळेल.

या बैठकीत आमदार शोभा ताई फडणवीस तसेच पेट्रीलीय डिलर असोसियेशनचे पदाधिकारी उपस्थित होते.