खासदार निधीतून चार वर्षात 465 कोटींची कामे

नवी दिल्ली, 31 : महाराष्ट्रातील लोकसभा खासदारांच्या स्थानिक विकास निधीतून गेल्या चार वर्षात ४६५ कोटी २६ लाख रुपये विविध विकास कामांवर खर्च करण्यात आले आहेत.   

महाराष्ट्रातील ४८ लोकसभा खासदारांना प्रतिवर्षी प्रत्येकी ५ कोटी रुपयांचा निधी त्यांच्या मतदार संघातील विविध विकास कामे करण्यासाठी दिला जातो. सन २०१४-१५ ते जानेवारी २०१८ या काळात राज्याला ६१० कोटी रुपयांचा निधी केंद्र शासनाने उपलब्ध करून दिला आहे, यापैकी ४६५ कोटी २६ लाख रुपये प्रत्यक्ष खर्च करण्यात आले आहेत. खर्चाची ही टक्केवारी ७६.२७ टक्के इतकी आहे. चालू आर्थिक वर्षात १७.५ कोटी रुपयांचा निधी डिसेंबर अखेर राज्याला मिळाला आहे, मार्च २०१८ पर्यंत उर्वरित निधी देण्यात येतो. सन २०१४-१५ याकाळात राज्याला २४० कोटी रुपये मिळाले. २०१५-१६ या वर्षात २२७ कोटी ५ लाख, २०१६ - १७ या काळात १२५ कोटी असे एकूण ६१० कोटी रुपयांचा खासदार निधी महाराष्ट्राला मिळाला आहे. 

खासदारांनी सुचविली १०६५ कोटींची कामे

गेल्या चार वर्षात राज्यातील सर्व खासदारांनी एकूण १०६५ कोटी रुपयांच्या विकास कामांची शिफारस केली होती, त्यापैकी जिल्हा प्रशासनाने ६८७ कोटी ४३ लाख रुपयांची विकास कामे मंजूर केली आहेत, तर प्रत्यक्ष खर्च ४६५ कोटी २६ लाख इतका झाला आहे.

देशाचा खासदार निधी ३९५० कोटींचा

देशातील लोकसभा ,राज्यसभा व नामनिर्देशित खासदारांचा  एकूण खासदार निधी ३९५० कोटी इतका आहे, यामध्ये लोकसभा खासदारांचा निधी २७२५ कोटी तर राज्यसभा व नामनिर्देशित खासदारांचा निधी १२२५ कोटी इतका आहे.   

महाराष्ट्र परिचय केंद्राच्या अधिकृत व्टिटर हॅण्डलला फॉलो करा        :  http://twitter.com/micnewdelhi

                                                                     ००००००