धावपटू ललीता बाबरला अर्जुन पुरस्कार प्रदान

नवी दिल्ली, 22 : धावपटू ललीता बाबरला आज राष्ट्रपती प्रणब मुखर्जी यांच्या हस्ते अर्जुन पुरस्काराने गौरविण्यात आले.

मेजर ध्यानचंद यांचा जन्म दिवस राष्ट्रीय क्रीडा दिन म्हणून साजरा करण्यात येतो. याचेच औचित्य साधून केंद्रीय क्रीडा मंत्रालयाच्यावतीने आज राष्ट्रपती भवनात पुरस्कार वितरण सोहळयाचे  आयोजन करण्यात आले. यावेळी, केंद्रीय क्रीडा राज्य मंत्री विजय गोयल, यासह क्रीडा मंत्रालयाचे वरीष्ठ अधिकारी उपस्थित होते.

 क्रीडा क्षेत्रात सर्वोच्च मानला जाणारा ‘राजीव गांधी खेळ रत्न’ पुरस्काराने चौघा खेळाडूंना गौरविण्यात आले. यंदा झालेल्या रिओ ऑलिम्पिकमध्ये बॅडमिंटन क्रीडा प्रकारात रौप्य पदक पटकावणारी पी.व्हि सिंधू, कुस्तीमध्ये कांस्य पदक पटकावणारी साक्षी मलिक तसेच जिमनॉस्टीकमध्ये चमकदार कामगिरी करणारी दिपा कर्माकर आणि नेमबाज जितु राय यांना ‘राजीव गांधी खेळ रत्न’पुरस्कार प्रदान करण्यात आले. या पुरस्काराचे स्वरूप 7.5 लाख रूपये रोख असे आहे.

रमेश नागापूरी यांना एथलेटिक्ससाठी, सागार माल धायल यांना मुष्ठियुद्धसाठी, राज कुमार शर्मा यांना क्रिकेटसाठी, बिश्चेश्वर नंदी यांना जिमनॉस्टीक,  प्रदीप कुमार यांना जलतरणासाठी (जीवनगौरव), महाबीर सिंग यांना कुस्तीसाठी (जीवनगौरव) यांना द्रोणाचार्य पुरस्काराने गौरविण्यात आले. द्रोणाचार्य पुरस्कार हा उत्कृष्ट खेळाडू घडविणा-या प्रशिक्षकांना प्रदान केला जातो. पुरस्काराचे स्वरूप द्रोणाचार्य यांची प्रतिमा, प्रमाणपत्र आणि 5 लाख रूपये रोख असे आहे.

धावपटू ललिता बाबर, तिरंदाज खेळाडू रजत चव्हाण,  बिलियर्ड्स आणि स्नूकर खेळाडू सौरव कोठारी, मुष्ठियोद्धा शिवा थापा, , फुटबॉलपटू सुब्राता पॉल, हॉकीपटू राणी व वी.आर. रंगनाथ, नेमबाज गुरप्रीत सिंग व अपुर्वी चंदेला, टेबल टेनिसपटू सौम्याजित घोष, कुस्तीगीर विनेश व अमित कुमार, पॅरा ऐथलेट संदीपकुमार सिंग मान व कुस्तीगीर विरेंद्र सिंग(कर्णबधीर)यांना अर्जुन पुरस्कार प्रदान करण्यात आले.

क्रिकेटपटू अजिंक्य राहाणे यांनाही अर्जुन पुरस्कार जाहीर झाला मात्र ते परदेश दौ-यावर असल्यामुळे आजच्या कार्यक्रमात उपस्थित राहू शकले नाहीत. पुरस्काराचे स्वरूप अर्जुनाची प्रतिमा, प्रमाणपत्र आणि 5 लाख रूपये रोख असे आहे.

रोंईगसाठी राजेंद्र प्रल्हाद शेळके, एथलेटिक्स सत्ती गीथा, हॉकीपटू सिल्वॉनस डुंग डुंग यांना आज ध्यानचंद पुरस्काराने गौवरविण्यात आले. एखादया खेळासाठी संपूर्ण जीवन वाहीलेल्या खेळाडुंना हा पुरस्कार प्रदान केला जातो. या पुरस्काराचे स्वरूप ध्यानचंद यांची प्रतिमा प्रमाणपत्र आणि 5 लाख रूपये रोख असे आहे.

तरूण पिढीला खेळाकडे आकृष्ट करण्यासाठी विविध संस्थाना राष्ट्रीय खेल प्रोत्साहन पुरस्कार प्रदान केले जातात. मुंबई येथील दादर पारसी झोरोस्ट्रेंन क्रिकेट क्लबला पुरस्कार प्रदान करण्यात आला. या क्लबचे मंगेश भालेकर यांनी पुरस्कार स्वीकारला.

  हॉकी सिटीझन ग्रुप, उषा स्कूल ऑफ ऐथलिटिक्स, स्टाईरस, इंडियन इनफ्रास्ट्रक्चर फायनांन्स लीमीटेड या कंपनीला क्रीडा क्षेत्रात केलेल्या उल्लेखनिय कामासाठी पुरस्कार प्रदान करण्यात आले.

 रिर्झव बँक ऑफ इंडियाला कर्मचां-याना क्रीडा क्षेत्रात प्रोत्साहन तसेच क्रीडा कल्याणकारी योजना राबविण्यासाठी पुरस्कार प्रदान करण्यात आला. क्रीडा क्षेत्राच्या विकासासाठी सुब्रोतो मुखर्जी क्रीडा शिक्षण संस्थालाही राष्ट्रीय खेळ प्रोत्साहन पुरस्कार प्रदान करण्यात आला. यामध्ये पुरस्काराचे स्वरूप चषक तसेच प्रमाणपत्र प्रदान केले गेले.

मौलाना अबुल कलाम आझाद ट्रॉफी वर्ष 2015-16 पंजाब विद्यापीठ पतीयाळाला प्रदान करण्यात आली. आंतर विद्यापीठ क्रीडा स्पर्धेत उत्तम कामगिरी करणा-यांना विद्यापीठाला हा पुरस्कार दिला जातो. पुरस्काराचे स्वरूप दहा लाख रूपये रोख आणि प्रमाणपत्र असे आहे.