नाशिकच्या पत्रकारिता महाविद्यालयाच्या विद्यार्थ्यांची महाराष्ट्र परिचय केंद्राला भेट

नवी दिल्ली, 23 : नाशिक येथील एच.पी.टी कला आणि आर.वाय.के विज्ञान महाविद्यालयाच्या पत्रकारिता विभागाच्या विद्यार्थ्यांनी गुरूवारी महाराष्ट्र परिचय केंद्राला भेट दिली. त्यांनी यावेळी परिचय केंद्राच्या वैविध्यपूर्ण कार्याची माहिती जाणून घेतली.             

दिल्ली अभ्यास दौ-यावर असणा-या या 36 विद्यार्थ्यांनी, प्राध्यापिका डॉ.वैशाली बालाजीवाले, दै. देशदूत चे संचालक संपादक विश्वास देवकर आणि रमेश शेजवाळ यांच्यासह आज महाराष्ट्र परिचय केंद्राला भेट दिली. परिचय केंद्राचे उपसंचालक दयानंद कांबळे यांनी उपस्थितांचे स्वागत केले. यावेळी या दिल्ली अभ्यास दौ-याच्या समन्वयक निवेदिता वैंशपायन, परिचय केंद्राच्या माहिती अधिकारी अंजू निमसरकर-कांबळे, उपसंपादक रितेश भुयार उपस्थित होते.    

        यावेळी औपचारिक वार्तालाप झाला. महाराष्ट्र शासनाच्या माहिती व जनसंपर्क महासंचालनालया अंतर्गत दिल्लीत कार्यरत महाराष्ट्र परिचय केंद्राच्या कार्याची वैविध्यपूर्ण माहिती उपसंचालक दयानंद कांबळे यांनी दिली. महाराष्ट्र सदनात कार्यरत खासदार कक्षाद्वारे साधण्यात येणारा समन्वय व महाराष्ट्राबाहेरील मराठी मंडळांशी साधण्यात येणारा समन्वय, प्रसार माध्यमांशी साधण्यात येणारा समन्वय, नव माध्यमांचा प्रभावी उपयोग, परिचय केंद्रातर्फे राबविण्यात येणारे विविध उपक्रम आणि शासनाचा जनसंपर्क साभांळताना घ्यावी लागणारी खबरदारी आदींची उदाहरणांसहीत माहितीही श्री.कांबळे यांनी दिली. यावेळी  विद्यार्थ्यांच्या प्रश्नांना श्री. कांबळे यांनी मनमोकळी उत्तरे दिली.

 उपस्थित मान्यवर आणि विद्यार्थ्यांना यावेळी महाराष्ट्र परिचय केंद्राची प्रकाशने भेट स्वरूपात देण्यात आली.                                                                 0000000