नागपूर आंतरराष्ट्रीय विमानतळावरून शेळया-मेंढया आखाती देशाला निर्यात

नवी दिल्ली दि. 25 :  नागपूर आंतरराष्ट्रीय विमानतळावरून  येत्या 30 जूनला प्रथमत: 2000 शेळया-मेंढया आखाती देशाला  निर्यात होण्याची, माहिती आज खासदार डॉ. विकास महात्मे यांनी पत्रकार परिषदेत दिली.

येथील उद्योग भवनात पत्रकार परिषदेचे आयोजन खासदार डॉ. विकास महात्मे यांनी केले. यावेळी कृषी व प्रक्रियाकृत खाद्यपदार्थ निर्यात विकास प्राधिकरणाचे (अपेडा) महाव्यवस्थापक उपेन्द्र वत्स उपस्थित होते.

विदर्भातील आत्महत्याग्रस्त  भागातील  शेतक-यांचे उत्पन्न वाढविण्यासाठी शेतक-यांच्या शेळया-मेंढयांचे निर्यात करण्याचे पाऊल शासनाव्दारे उचलले जात आहे. पहिल्या टप्प्यात 30 जूनला 2000 जीवंत शेळया-मेंढया आखाती देशात निर्यात केल्या जातील. निर्यात होणा-या शेळया-मेंढयांची वैद्यकीय तसेच संबधित तपासणी केली जात आहे. मुख्यमंत्री देवेंद्र फडणवीस यांच्या उपस्थितीत नागपूर आंतरराष्ट्रीय विमानतळावरून पहिल्या खेपेच्या शेळया-मेंढया निर्यात केल्या जातील.  

केंद्रीय उद्योग व वाणिज्य मंत्रालय, केंद्रीय कृषी मंत्रालय, मिहान, एअर इंडिया यांच्या संयुक्त सहयोगातून ही योजना आखली गेली, असल्याचे श्री महात्मे माहिती यांनी दिली. या नवीन उपक्रमाव्दारे मेंढपाळ, शेळी पालन करणा-या  शेतक-यांना रोजगाराच्या तसेच आर्थिक उत्पन्नाच्या नवीन संधी उपलब्ध होणार आहेत.  पशुधन हे शेतक-यांसाठी ‘एटीएम’ सारखे असते. पशुधनापासून शेतक-यांना आर्थिक लाभ मिळतो.

भविष्यात शेळया-मेंढया निर्यातीसाठी तत्सम सहकारी संस्था निर्माण करण्यात येण्याचा मानस असल्याचे डॉ. महात्मे यांनी सांगितले.